Қазақстан және БҰҰ: адам өміріндегі жаһандық мақсаттар

Астана, 2026 жылғы 21 қазан – Біріккен Ұлттар Ұйымы күнін мерекелеу аясында Қазақстан Республикасы Сыртқы істер министрінің бірінші орынбасары Ержан Ашықбаев Қазақстан Республикасының Ұлттық музейінде өткен «GLOCAL: Global Goals. Local Lives» көрмесінің ашылу рәсіміне қатысты.

Е. Ашықбаев өз сөзінде Қазақстанның БҰҰ Жарғысының мақсаттары мен қағидаттарына, сондай-ақ жаһандық міндеттерді шешудегі Ұйымның орталық рөліне бейілділігін растады. Ол Қазақстанның БҰҰ-мен әріптестігі адам құқықтарын қорғаудан бастап халықаралық қауіпсіздікке дейінгі кең ауқымды мәселелерді қамтитынын атап өтті.

Министрдің бірінші орынбасары Қазақстандағы саяси өзгерістердің адами капиталды дамыту және заң үстемдігін нығайту міндеттерімен өзара байланысына тоқталды. Тұрақты даму мақсаттарын іске асыруға және оларды ұлттық жоспарлау жүйесіне, соның ішінде Қазақстан Республикасының 2029 жылға дейінгі Ұлттық даму жоспарына енгізуге ерекше назар аударылды.

Ынтымақтастықтың маңызды нәтижелерінің бірі – Алматы қаласында Орталық Азия мен Ауғанстанға арналған БҰҰ-ның Тұрақты даму мақсаттары жөніндегі Өңірлік орталығының құрылуы. Қазақстан бұл Орталықты өңір мемлекеттерінің БҰҰ жүйесімен өзара іс-қимыл жасауына, бірлескен жобаларды іске асыруына және ортақ даму міндеттерін шешуіне арналған негізгі алаң ретінде қарастырады.

Е. Ашықбаев сондай-ақ Қазақстанның бастамасымен 2026 жылы өткізіліп жатқан Тұрақты даму жолындағы халықаралық еріктілер жылының маңызын атап өтті. Сонымен қатар ол Президент Қасым-Жомарт Тоқаевтың 22 сәуірді Халықаралық Жер планетасын көгалдандыру күні деп жариялау жөніндегі бастамасын қолдағаны үшін халықаралық әріптестерге алғысын білдірді.

Іс-шара аясында ұйымдастырылған көрмеде қызметі мен өмір жолы Қазақстанның БҰҰ мекемелерімен ынтымақтастығының нақты нәтижелерін көрсететін адамдардың 30 оқиғасы ұсынылған. Экспозиция 2030 жылға дейінгі Тұрақты даму күн тәртібінің бес негізгі бағытына: адамға, планетаға, өркендеуге, бейбітшілікке және әріптестікке арналған. Көрмеге қойылған оқиғалар денсаулық сақтау, білім беру, қоршаған ортаны қорғау, әлеуметтік инклюзия, адам құқықтарын қорғау және еріктілік салаларын қамтиды.

Іс-шараға мемлекеттік органдардың, дипломатиялық корпус пен халықаралық ұйымдардың өкілдері, сондай-ақ азаматтық қоғам мүшелері қатысты.

Көрме Қазақстан Республикасының Ұлттық музейінде 2026 жылғы 4 қарашаға дейін жалғасады.